Heilsustofnun NLFÍ

Tillagan er vel unnin og setur fram sterka hugmynd um byggingu Heilsustofnunar samgróna landslaginu. Þannig aðskilur hún sig frá aðliggjandi byggð og nýrri íbúðabyggð, „þorpinu“, sem staðsett er sunnan til á lóðinni. Sett er fram áhugaverð tillaga um annars konar aðkomu að Heilsustofnun með stórum garðskála; „grænni veröld“ sem opin er almenningi til fræðslu og dægradvalar. Þannig verða græn veröld og sundlaugin mjög afgerandi sem andlit heilsuþorpsins útávið. Austur-vestur ásinn liggur svo að Heilsustofnun sunnan við og heilsudvalarstað að norðan og áfram að stíg niður að Varmá. Öllum bílastæðum er komið fyrir í niðurgröfnu tveggja hæða og hálfyfirbyggðu bílastæðahúsi norðaustan við Lækjarbrúnarhverfið. Hugmyndin er góð en líklegast kostnaðarsöm í framkvæmd.

Meðferðakjarninn er allur á einni hæð og leystur ágætlega með 40 herberjum á tveimur efri hæðum sem ljúka má í fyrsta áfanga. Herbergjum er raðað á eina hlið á gangi sem liggur í kringum inngarð. Vegalengdir eru óþarflega langar og lítil yfirsýn fyrir starfsfólk. Ýmsar útfærslur virðast óraunhæfar og langir, mjúkir gangar gera bygginguna stóra í ásýnd. Þriggja hæða byggingar með svo langar samhangandi ásýndir virðast stórar og framandi í þessu landslagi en þannig er tillagan í andstöðu við markmið sitt. Hugmyndin að baki þessarar tillögu hentar e.t.v. betur heilsudvalarstaðnum. Hann er skipulagður í öllum höfuðatriðum eins en aðeins smærri með vel staðsettum útiböðum sem snúa að Varmá. Tengsl sundlaugar við meðferðarkjarna þyrfti að bæta. Íbúðarbyggðin á suðurhluta svæðisins er vel staðsett og aðlaðandi þar sem bíllinn víkur fyrir gangandi umferð. Umsögn dómnefndar: Höfundar hafa sett fram áhugaverðar og vel unnar hugmyndir sem samrýmast markmiðum samkeppnislýsingar ágætlega og fær innkaup.